Daar is 'n reuse verskil tussen oorgawe of om net in iets geïnteresseerd te wees.  John Mason sê: "You're not truly free until you've been made captive by your supreme mission in life."  Daar is 'n groot stuk vryheid, vreugde en vrede daarin om jou skeppingsdoel uit te leef.  Wanneer jy woeker met die gawes, vermoëns en talente wat jy van die Here ontvang het, beleef jy 'n stuk genoegdoening wat bykans nie met woorde beskryf kan word nie.  Toewyding en oorgawe aan 'n saak bewerkstelling  'n diep en salige tevredenheid wat jou ten spyte van harde werk - nogtans vervuld laat voel.  Wanneer jy waarlik aan 'n saak uitverkoop is, sal jy nie verskonings soek om jou verantwoordelikheid te ontduik nie, maar des te meer redes en inspirasie vind om dit met uitnemendheid deur te voer.  Wanneer jy aan 'n saak uitverkoop is, is jou toewyding daaraan die bewys van die hoë waarde wat jy daaraan heg.