Die Bybel bly nie stil oor nederigheid nie.  Paulus skryf dat nederigheid iets is wat ons moet aantrek. Dit is nommerpas, maar deug nie as dit vergete hang in die klerekas.  Nederigheid is daardie een karaktereienskap wat jy moontlik kan verloor die oomblik wanneer jy jouself as 'n nederige persoon beskryf.  Dit laat my dink aan die persoon wat 'n medalje vir nederigheid gewen het ... hy het dit met groot trots gedra.  Deur die jare bly die woorde van Tannie Charity Brits vir my klokhelder: "'n Persoon wat baie van homself dink het nie baie gedink nie".  Sy het dit in 1992 tydens 'n vergadering vir 'n groep pastore gesê.  Waar ons ook al leef en in hierdie wêreld ons roeping uitleef, laat dit met  nederigheid geskied.  Nederigheid kultiveer 'n lewenswyse van offervaardige diensbaarheid, waarin die een die ander hoër ag as homself.  Dit is immers die navolgenswaardige voorbeeld en gesindheid wat ons van Christus het, en dit is hierdie nederigheid waarmee ons meegevoer moet word.