Dit is 'n groot vreugde en seën om vriende te hê.  Ware vriende.  Vriende wat deur dik en dun by jou staan.  Vriende wat saam met jou persoonlike hoogtepunte en deurbrake vier.  Vriende wat jou troos en onderskraag wanneer jy deur een of ander krisis gestormloop en omgestamp word.  Wat van vriende wat jy kan vertrou om saam met jou opgewonde te wees oor jou drome?  Vriende wat aandagtig na jou luister en opreg belangstel wanneer jy praat.  Vriende wat saam met jou bid; en ook vir jou bid - selfs wanneer jy nie eers daarvan weet nie.  Goeie vriende is ook vriende wat jou waarsku of vermaan wanneer dit nodig is.  Het jy sulke vriende?  Hier is iets om te oorweeg: Maak 'n lys van al die eienskappe wat jy graag in jou vriende soek; 'n deeglike lys.  En wanneer jy daarmee klaar is, gaan wees so vriend vir ander.  Maak vrede daarmee dat omstandighede en die tyd wat verloop jou ware vriende uitwys en dat jy gaande weg leer dat betekenisvolle vriendskappe skaars is, maar tegelyk ook baie kosbaar is.