Ons is diensknegte van die Here.  Die gawes, vermoëns en talente wat ons ontvang het is nie om vir onsself naam te maak nie, maar om daarmee tot die Here se diens te wees.  Dit is hoe Hy deur ons, die lewens van ander wil aanraak.  Wanneer ons egter ons begaafdheid wil gebruik soos 'n verhoog om die middelpunt van aandag te wees, het ons 'n baie kort speelvak.  In hierdie tipe egoïstiese en selfvoldane skouspel hou populariteit net totdat die volgende gier of groot naam op 'n mensgemaakte verhoog verskyn.  Wanneer ons egter ons vaardighede aan die Here toevertrou om daarmee tot Sy diens te wees, dan gebeur daar dikwels dinge met 'n ewige impak.  Hierdie impak word nie bereken in terme van "likes" en "shares" nie, want die ewigheid kan nie geweeg of gemeet word nie.  Is dit nie mooi - en kosbaar - om te sien hoe die Here mense se lewens aanraak nie?  Ons sal nooit in staat kan wees om te bepaal wat die omvattende waarde van die Here se werk in mense lewens is nie, al gebruik Hy mense om mense te bereik.