Philip de Jager

Die lewe is ‘n besige affêre.  Die meeste van ons leef teen ‘n enorme tempo.  Die gevaar van hierdie tempo waarteen ons leef, is dat ons nie ons waardering uitspreek nie; en soms mense se moeite en opofferings as vanselfsprekend aanvaar (lees gerus die vorige plasing: Spreek jou waardering uit). Die ander gevaar en verlies wat ons vanweë die dolle gejaag in die gesig staar, is die kosbare dinge wat ons miskyk.  Nie omdat ons ondankbaar is nie, net omdat ons so vinnig leef en beweeg.  Vriende, die gevaar van die tempo waarteen ons soms leef, is nie net dat ons verby mekaar leef nie.  Maar dat ons ook verby onsself leef.  En die allergrootste risiko in dit alles, die oomblikke waarin ons die hart van Jesus mis – sodat ons meelewend in sy missie kon wees.

STOP!  Hierdie is nie ‘n toegeeteken waar jy net vinnig vir iemand anders ryvoorrang gee nie.  Dit is ‘n doelbewuste en daadwerklike STOP!  Hoofletters.  Uitroepteken!  ‘n Gebiedende opdrag om te STOP!  Nie net om jou spoed te verminder om stadiger verby te gaan nie.  Maar om jou tot stilstand te bring.

STAAN STIL!  Nie net om gou asem te skep nie, maar om tyd te gun vir bewuswording, bewondering en belewenis.  Sien die mooi.  Sien die eenvoud.  Sien die seer.  Sien die behoefte.  Raak bewus van wat rondom jou aangaan.  En ook van dit wat besig is om binne in jou te gebeur.

BELEEF!  Wees teenwoordig.  Nie om planne te beraam nie.  Maar om diep meelewend te wees.  Trek spreekwoordelik jou skoene uit (of doen dit regtig as jy wil), nie net omdat dit ‘n heilige oomblik is nie, maar om jou kaalvoet en pretensieloos met die oomblik in kontak te bring.  Sonder maskers, maar met hart!

En wanneer jy weer jou reis voortsit, moet nie sommerso versnel en jaag nie.  Wees ‘n opmerksame en bedagsame reisgenoot.