Mansgenoeg

Ons gesprek oor mansgenoeg laat ons aandag aan drie sake skenk, naamlik:

Ons motto

Natuurlik verwys ek na die woorde van I Kor. 16:13:

“Waak, staan in die geloof, wees manlik, wees sterk.”

Is jy man of muis?  Hierdie manlikheid verwys na dapperheid.  Ons het beslis in ons dag dapper helde van geloof nodig.  In ons dag het ons nodig dat manne gegroet sal word soos Gideon deur die Engel van die Here gegroet was:

“En die Engel van die HERE het aan hom verskyn en vir hom gesê: Die HERE is met jou, dapper held!
[Rig. 6:12]

Dit wil ons leer om ons nie in die dag van versoeking en beproewing slap te gedra nie.

“Gedra jy jou slap in die dag van benoudheid, dan skiet jou krag te kort.”
[Spr. 24:10]

“If you faint in a crisis, you are weak.”
[Prov. 24:10 (GW)]

Kom, ons wees mansgenoeg om manlik te wees!

Die gevaar van die dekonstruksie van manlikheid

Dit is vervolgens nodig dat ek jou vandag sal bemoedig en sal aanmoedig om mansgenoeg te wees.  Laat ons ag gee op wat die Goeie Woord van die Here ons leer:

“En God het die mens geskape na sy beeld; na die beeld van God het Hy hom geskape; man en vrou het Hy hulle geskape.
[Gen. 1:27]

Moet nie toelaat dat die dekonstruksie van manlikheid wat in hierdie post-Christendom kultuur en sekulêre samelewing aan die werk is, jou ontmoedig om manlik te wees nie.  Jy is ‘n man deur God geskape – en jy het nie nodig om enigsins daaroor skuldig te voel nie.  Natuurlik is dit nie ‘n verskoning om jou onbehoorlik, onbeskof en ongemanierd te gedra nie.  Manlikheid is nie sinoniem aan onafgerondheid, skurfheid of barbaarsheid nie.  Maar jy het gewis nie nodig om vir jou man-wees en manlikheid verskoning te vra nie.  Luister, al het jy ‘n geneigdheid om ‘n sterker aanvoeling vir die estetiese dinge van die lewe te hê, tree nogtans manlik op.  Wees trots daarop om ‘n man te wees.  Help jou seun(s) om goeie mans te wees.  En begelei jou dogter(s) deur jou voorbeeld om aan manlike seuns voorkeur te gee.  Wees mansgenoeg om jou nie te laat meesleep met die dekonstruksie van manlikheid nie.

Wat beteken dit om mansgenoeg te wees

Om mansgenoeg te wees is om soos Dawid ‘n man na God se hart te wees:

“Maar nou sal jou koningskap nie bestaan nie. Die HERE het vir Hom ‘n man na sy hart gesoek; en die HERE het hom as vors oor sy volk aangestel, omdat jy nie gehou het wat die HERE jou beveel het nie.”
[I Sam. 13:14] (Hand. 13:22)

‘n Man na God se hart is aan die Here uitverkoop en wandel volgens Sy weë.  ‘n Man na God se hart is nederig om vergifnis vir sy oortredinge te vra.

Om mansgenoeg te wees is om die man van jou vrou te wees.

Jou vrou moet vir jou onvervangbaar wees.

“Manne, julle moet jul eie vroue liefhê, soos Christus ook die gemeente liefgehad en Homself daarvoor oorgegee het”
[Ef. 5:25]

Wees lojaal teenoor jou vrou en hou die bed onbesmet (Hebr. 13:4).

Om mansgenoeg te wees moet jy jou kind(ers) se waardige en betrokke pa wees.

“En vaders, moenie julle kinders vertoorn nie, maar voed hulle op in die tug en vermaning van die Here.”
[Ef. 6:4]

Moet nie jou kinders se lewens verswaar deur jou leefwyse of optrede nie.  Kry in Jesus ‘n greep op jouself sodat jy nie ‘n tiran van ‘n pa word nie.  Voed jou kinders in die weë van die Here op en dissiplineer hulle.  Ons let op:

“Oefen die seun volgens die eis van sy weg; dan sal hy, ook as hy oud word, daar nie van afwyk nie.”
[Spr. 22:6]

Om mansgenoeg te wees sal jy ander seuns en manne mentor.

Deur gesonde en Skrifgefundeerde mentorskap skep ons hoop vir die toekoms.  Die noodsaaklikheid van mentorskap kom na aanleiding van teksverse soos II Tim. 2:1-2 en Spr. 27:17 duidelik aan die lig:

“¹ Jy dan, my seun, wees sterk deur die genade wat in Christus Jesus is;
² en wat jy van my gehoor het onder baie getuies, vertrou dit toe aan getroue manne wat bekwaam sal wees om ook ander te leer.”
[II Tim. 2:1-2]

“Yster slyp yster, so slyp die een mens die persoon van die ander.”
[Spr. 27:17]

Wees mansgenoeg om ‘n kind van God, man van jou vrou, pa van jou kind(ers) en mentor van seuns te wees.

Ten slotte

Kom ons wees mansgenoeg om ons Godgegewe mandaat om mans te wees daadkragtig uit te leef.  D.L. Moody het gesê: “The world has yet to see what God can do with a man fully consecrated to Him.  By God’s help, I aim to be that man.”  Kom ons maak dit ook ons doelwit en passie!