Waak. Staan in die geloof. Wees manlik. Wees sterk.

Jy moet waak. 

Om te waak beteken eenvoudig om wakker te wees.  Om te waak is om proaktief te wees, om in ‘n gereedheid-grondslag te leef sonder om paranoïes te wees.  Dit beteken dat jy nie die lewe vanuit krisis-bestuur leef nie.  Jy leef met ‘n plan.  Om te waak is om besorgd te wees oor die dinge wat aan sy sorg toevertrou is.  Om te waak is om nie toe te laat dat die sorge van die lewe jou ontsenu nie, want dit takel jou paraatheid en waaksaamheid af.  Daarom leer die Skrif ons:  “Wees nugter en waaksaam, want julle teëstander, die duiwel, loop rond soos ‘n brullende leeu, en soek wie hy kan verslind” (I Pet. 5:8).  Om te waak, is om ook aan die duiwel geen plek in jou lewe te gee nie (Ef. 4:7), maar om daarop ingestel te wees om God altyddeur te behaag (Kol. 1:9-10).  Daarom moet ons waaksaamheid verstaan in die lig van die volgende perikoop, naamlik: staan in die geloof. 

Staan in die geloof. 

Om in die geloof te staan is om nie deur die storms van die lewe ontsenu of oorweldig te word nie.  Om in die geloof te staan, is om gelowig standpunt in te neem teen die vyand van ons siele wanneer bekommernis of sorge jou wil oorval.  “Hom moet julle teëstaan, standvastig in die geloof, omdat julle weet dat dieselfde lyding opgelê word aan julle broederskap wat in die wêreld is” (I Pet. 5:9).  Dit is juis in teenstrydighede dat geloof werk, want geloof is ‘n vaste vertroue op die dinge wat jy hoop, ‘n bewys van die dinge wat jy nie sien nie (Hebr. 11:1).  Om in die geloof te staan is om te weet wat jy glo, en hoekom jy dit glo – en meer nog: OM TE WEET IN WIE JY GLO!  Ons leer weereens uit Paulus se lewe hierdie belangrike les:  “Om hierdie rede ly ek ook hierdie dinge; maar ek skaam my nie, want ek weet in wie ek geglo het, en ek is oortuig dat Hy mag het om my pand te bewaar tot dié dag toe” (II Tim. 1:12).  Om in die geloof te staan is om met ‘n vaste oortuiging te sê dat jy weet dat die goedheid, grootheid, getrouheid en genade van God groter is as die lewe self.  Dit is om nie toe te laat dat die siek, seer, sat en stukkende realiteite van die lewe jou aan God se vermoë laat twyfel nie.  Nee!  Jy staan in die geloof!  Jy bely skaamteloos dat God steeds die onvergelykbare God is.  Om in die geloof te staan beteken dat jy jou lewe inrig en leef na aanleiding van Skrifgefundeerde waardes.  En hierdie waardes is die maatstaf wat jy gebruik in jou besluitnemingsprosesse en gee daartoe aanleiding dat Gal 1:10 ‘n motto in jou eie lewe is:  “Soek ek dan nou die guns van mense, of van God? Of probeer ek om mense te behaag? As ek nog mense behaag, dan sou ek nie ‘n dienskneg van Christus wees nie” (Gal. 1:10).

Wees manlik

Dit is reeds duidelik, om die bogenoemde twee dinge te doen, vat ‘n man en nie ‘n muis nie.  En daarom het manlikheid nie hier met geslag te make nie.  Om manlik te wees, is om manmoedig te wees.  Manlikheid het te make met inbors, karakter, integriteit.  Om manlik te wees is om volwasse te wees … om nie meer soos ‘n seuntjie op te tree nie.  Dit is duidelik: Om manlik te wees is om die verskil tussen kinderagtigheid (pettiness) en kinderlikheid (kinderlike oorgawe) te verstaan.   Volwasse manne hanteer die lewe anders.  Geestelik volwassenheid lei ook daartoe dat die lewe en geloofsake anders hanteer word.  Laat dit jou nie ook dink aan I Kor. 13:11: “Toe ek ‘n kind was, het ek gepraat soos ‘n kind, gedink soos ‘n kind, geredeneer soos ‘n kind; maar nou dat ek ‘n man is, het ek die dinge van ‘n kind afgelê.”  Om manlik te wees het daarom daarmee te make dat jy volwasse insig in sake sal hê:  “Broeders, moenie kinders wees in die verstand nie, maar wees kinders in die boosheid en wees volwassenes in die verstand” (I Kor. 14:20).

Wees sterk

Al drie die bogenoemde eienskappe: om te waak, om in die geloof te staan, en om manlik te wees gee aanleiding tot die vierde eienskap naamlik sterkte.  Om sterk te wees beteken in essensie om in jou oortuigings en vasberadenheid te ontwikkel en dus nie pateties te raak nie.  Dit is om intensioneel ten opsigte van jou ganse lewe te wees, om entoesiasties en gedetermineerd te wees – en altyd in hierdie intensionaliteit toe te neem.  Om sterk te wees is om deursettingsvermoë te hê.  Dit is om klaar te maak waarmee jy begin het, en dit laat ons dink aan Paulus se woorde ten opsigte van sy eie lewe: “Ek het die goeie stryd gestry; ek het die wedloop voleindig; ek het die geloof behou” (II Tim. 4:7).  Hierdie sterk-wees ontwikkel nie deur jou eie toedoen nie, maar spruit uit jou verhouding met God: “Eindelik, my broeders, word kragtig in die Here en in die krag van sy sterkte” (Ef. 6:10). Om sterk te wees is dus nie om vir jouself naam te maak nie, maar om vir die Naam bo alle name uit te staan.